Talle gesinne deel die frustrasie dat die feesseisoen so gekommersialiseer geraak het, dat ons vergeet wat dié tyd veronderstel is om te beteken. Inteendeel, dit het een van die mees spanningsvolle tye van die jaar geword. Het jy geweet dat Kersfees ingesluit is as een van die 43 mees spanningsvolle lewensgebeurtenisse in die Holmes-Rahe-skaal?
Een van die hoofoorsake van spanning of stres is finansieel: die koste van geskenke, gesinsetes en die in die algemeen hoër uitgawes tydens dié periode. Só kan jy die feestyd gebruik om jou kinders die waarde van geld te leer.
Ouers, in die besonder, kan druk ervaar van kinders wie se idee van die feesseisoen net oor die ontvang van geskenke gaan. Dikwels dra hul voorstelle vir geskenke by tot die ervaring van finansiële druk, maar dit is moontlik om dit as ʼn opvoedingsgeleentheid te gebruik.
Gesels as gesin oor wat die feestyd werklik vir julle beteken en hoe julle dit kan vier én terselfdertyd binne die begroting bly. Jy mag dalk verbaas wees om te vind dat dit vir sommige gesinslede genoeg is om net tyd saam deur te bring.
Indien jy ʼn bonus ontvang het, bespreek dit met die gesinslede en vra jou kinders hoe hulle voel die geld toegewys behoort te word. Gebruik die geleentheid om die belangrikheid daarvan om ‘n gedeelte te gebruik om skuld te delg of te spaar te beklemtoon, ook om ʼn gedeelte te spandeer en ʼn gedeelte met minderbevoorregtes te deel. Bespreek die beginsels van spaar as ʼn geleentheid om vir die toekoms voorsiening te maak, asook die belangrikheid daarvan om skuld te verminder sodat jy nie rente aan die bank betaal nie.
Vra hulle wat hulle voel belangrik is met betrekking tot uitgawes: ʼn Vakansie, ʼn aktiwiteit wat die gesin saam doen of geskenke? Daar is nie ʼn regte of ‘n verkeerde antwoord nie. Die waarde van die proses lê daarin om die kinders te help begryp dat jy beter keuses kan maak aan die hand van wat werklik vir die gesin belangrik is indien jy dinge bespreek.
Gesels dan oor hoe mense in nood die beste gehelp kan word: met tyd of geld? Watter sake lê jou kinders na aan die hart? Jy sal verbaas wees hoe oorweldigend mededeelsaam kinders is.
Terwyl gesinsgesprekke oor die feesseisoen jou kinders waardevolle lesse sal leer, kan jy dalk die een wees wat uiteindelik die meeste leer.
PASELLA
In die gees van geskenke gee hierdie feesseisoen, gee ons vyf spaarbussies weg aan vyf gelukkige lesers om hulle te help om hul kinders, die niggies en nefies in die familie, of hul kleinkinders te leer om van jongs af te spaar. Die spaarbussies, gerig op kinders tussen drie en sewe jaar oud, het drie afdelings waarin hulle hul sakgeld kan plaas: Spaar, spandeer en deel. Dit is ʼn skitterende manier om gesinsgesprekke aan te voor. Om een te wen, antwoord net met ʼn e-pos gemerk Money Box aan [email protected]
Die eerste vyf antwoorde sal oorweeg word en direk deur ons redaksionele span gekontak word.
|