Volg hierdie riglyne vir ʼn gesonder leefstyl, van die opruim van die wanorde op jou lessenaar tot geestelike detoks – alles vir ʼn effektiewer jy!
Elkeen van hierdie gewoontes kan in isolasie onbenullig voorkom, maar pak hulle een vir een aan en poog om almal vol te hou. Sodra jy almal geïmplementeer het en hulle momentum kry, sal jy meer gesonde gewoontes in plek wil hou.
1. KRY GENOEG ZZZ’s: Almal het nie agt uur slaap in ʼn nag nodig nie – sommige het ʼn bietjie minder nodig, en ander effens meer. The Sleep Foundation (www.sleepfoundation.org) beveel aan dat volwassenes (18-64 jaar oud) tussen sewe en nege uur slaap, terwyl ouer volwassenes effens minder – sewe tot agt uur – nodig het.
The Sleep Foundation beveel aan dat jy “aandag gee aan jou individuele behoeftes deur te bepaal hoe jy voel na verskillende hoeveelhede slaap”.
- Is jy produktief, gesond en gelukkig na sewe uur slaap? Of neem dit nege uur se gehalte ZZZ’s om jou in die hoogste rat te kry?
- Het jy gesondheidsprobleme, byvoorbeeld oorgewig? Loop jy die risiko van enige siektes?
- Ondervind jy slaapprobleme?
- Maak jy staat op kaffeïen om jou deur die dag ʼn hupstoot te gee?
- Raak jy lomerig terwyl jy bestuur?
Probeer om die aantal ure wat jy slaap aan te pas totdat jy voel dat jy optimaal funksioneer.
2. VERMINDER SUIKERINNAME: Indien jy verskeie koppies tee en/of koffie per dag drink met twee teelepels suiker in elk, sluit jy ʼn bykomende 10 of meer teelepels van dié soetigheid by jou dieet in. Verminder die hoeveelheid suiker wat jy by jou drankies voeg geleidelik en probeer só om dit mettertyd heeltemal uit te skakel. Jy sal agterkom dat jou smaaksintuig verander – jy sal begin om die natuurlike soetigheid in vrugte, suiwel en selfs groente te proe.
WENK: Wanneer jy ʼn laagtepunt in energie by die werk ervaar, moenie dadelik na die kitsbevrediging van ʼn suiker- of kaffeïenhupstoot soek nie, hou eerder ʼn pakkie ongesoute hoëproteïen neute in jou lessenaarlaai. Eet ʼn handvol daarvan en drink ʼn glas water. Dit sal jou ʼn langwerkende hupstoot in energie gee, sonder die hoogte- en laagtepunte van suiker- en kaffeïeninname.
3. RAAK ONTSLAE VAN ROMMEL: Dit is moeilik om van spanning ontslae te raak en te ontspan terwyl jou fisieke en emosionele ruimte vol rommel is. Die skrywer van Ditch Your Glitch (Metz Press), Kate Emmerson, definieer rommel as “enigiets wat nie langer vir jou iets beteken nie, vir welke rede ook al”. Sy verduidelik: “Om met enige vorm van rommel saam te leef mors jou energie, laat jou saai, futloos en oorweldig voel (dikwels in die letterlike betekenis van die woord), sonder enige noodsaaklike energie.” ʼn Wonderlike beginpunt is jou kantoorlessenaar. Sorteer een laai uit en voor jy dit agterkom, het jy die res ook aangedurf. Die wenresep is om iewers te begin en nie uit te stel nie.
4. SUIWER JOU LEWENSUITKYK
Vestig die gewoonte om jou brein daagliks van negatiewe gedagtes te suiwer. “Die hoofrede waarom ons brein suiwering nodig het, is omdat normale gedagtes toksies kan wees,” sê Jason Selk, skrywer van Executive Toughness (McGraw-Hill). Ons is geneig om op probleme en negatiwiteit te fokus, eerder as op die positiewe is in ons lewens. Hy verduidelik: “Lees die koerante, kyk na die nuus of luister na die gesprekke op kantoor. Almal praat oor probleme, eerder as oor oplossings.”
Volgens Selk fokus ons gewoonlik op dié dinge wat ons verkeerd gedoen het. Hy beveel aan dat ons elke dag net een minuut gebruik om te fokus op drie dinge wat ons goed gedoen het. “Iets hoef nie ʼn genesing vir kanker te wees om te kwalifiseer nie. Soos die groot Amerikaanse basketbalafrigter, John Wooden sê, klein dinge wat goed gedoen word, skep uitnemendheid.” Neem kennis van jou klein suksesse. |
