Ons ruim drie algemene gesondheidsmites oor kanker uit die weg om te verseker dat jy ten volle ingelig is. Onthou, vroeë opsporing red lewens.
Mite 1: Mans kan nie borskanker kry nie
Volgens die Kankervereniging van Suid-Afrika (Kansa) loop een uit 1249 mans die risiko om borskanker in hulle leeftyd te ontwikkel. Hoewel dié risiko nie so hoog is as vir vroue (een uit 33) nie, is dit steeds hoog genoeg dat dit noodsaaklik is dat almal daarvan kennis neem – nie slegs vroue nie.
Mite 2: Jy is te jonk om borskanker te kry
In der waarheid is ouderdom nie ʼn bepalende faktor in borskanker is nie. Talle vroue onder die ouderdom van 40 ontwikkel steeds die siekte, dus is dit noodsaaklik dat jy maandeliks ʼn bors-selfondersoek doen. Wees bedag op die volgende veranderinge: enige knoppe in die bors of armholte; veranderinge in die vel rondom die tepel; tepelafskeiding; kuiltjies op die tepel of ʼn tepel wat na binne keer; enige buitengewone verandering in die grootte van een bors; ʼn bors wat gewoonlik laer as die ander sit of tepels wat op verskillende vlakke is; enige vergrote kliere, of ʼn buitengewone swelling in die armholte. Raadpleeg jou huisarts indien jy enige van hierdie simptome het.
Mite 3: Slegs vroue met ʼn familiegeskiedenis dra ʼn risiko
Hoewel ʼn familiegeskiedenis jou risiko vir borskanker vergroot, is daar ʼn aantal ander faktore wat ook jou kans om die siekte te ontwikkel, verhoog. Kansa beveel ʼn gesonde lewenstyl aan, wat gereelde oefening om jou gewig in toom te hou en ʼn beperking van jou alkoholinname insluit, om jou risiko te verlaag. Verder word aanbeveel dat jy jou blootstelling aan kankerwekkende stowwe (karsinogene) uit die omgewing beperk, soos sigaretrook.
Oktober is Borskankerbewustheidsmaand, dus is dit die ideale tyd om vir ʼn ondersoek te gaan. Daar is ʼn aantal opsies beskikbaar:
1. Bors-selfondersoeke.
2. Sure-Touch – ʼn nie-indringende apparaat vir veilige borssiftingstoetse – beskikbaar by sommige Cansa Care Centres.
3. Jaarlikse mammogramme vir vroue oor 40.
4. Genetiese toetsing. Indien daar ʼn geskiedenis van borskanker in die familie is, is dit die moeite werd om seker te maak of jy die genetiese borskankermerkers dra.
Vir meer inligting, besoek: www.cansa.org.za
|