Wat gebeur met jou gevreesde siekte-dekking nadat jy gediagnoseer is? Ons ondersoek die redes waarom dit noodsaaklik is om hierdie dekking te hê.
Wanneer die werklikheid van ʼn lewensbedreigende siekte hulle in die gesig staar, motiveer dit die meeste mense om ʼn omvattende hersiening van hul bestaande risikodekking te doen ten einde te verseker dat dit voldoende is om vir hulle en hul gesinne voorsiening te maak. Dit is belangrik om te verstaan hoe die diagnose van ʼn siekte wat selfs nog in ʼn vroeë stadium is jou dekking kan beïnvloed.
Indien jy reeds dekking het, of dit vir dood, ongeskiktheid of gevreesde siekte is, sal jou premies en dekking onveranderd voortgaan, ongeag hoe jou gesondheid mettertyd verander. Dit is die grootste voordeel van die uitneem van dekking terwyl jy nog jonk en gesond is.
Indien jy gediagnoseer is met ʼn gevreesde siekte en nou enige van jou risikodekkings (dood, ongeskiktheid, gevreesde siekte of inkomstebeskerming) wil verhoog, sal dit uit ʼn onderskrywingsoogpunt as nuwe besigheid geklassifiseer word, en sal dit onderworpe wees aan mediese onderskrywing, tensy jy die opsie het om ʼn onderskrywingsvrye omskakeling te doen.
Die dekking waarvoor jy kwalifiseer, en die koers daarvan, sal bepaal word deur die ernstigheidsgraad van die siekte. Byvoorbeeld, ʼn vroeë diagnose (voor fase een) van borskanker waar die gewas ten volle verwyder is, kan ʼn laer risikogradering hê as iemand wat met fase drie kanker gediagnoseer is. Die tyd wat verloop het sedert die diagnose sal ook die onderskrywingsbesluite beïnvloed. Byvoorbeeld, ʼn 40-jarige man wat fase drie testikulêre kanker in sy vroeë 20’s gehad het, kan ʼn baie lae risiko in terme van onderskrywing dra.
Die ernstigheidsgraad en die tyd wat verloop het, sal bepaal of volle dekking met ʼn premiebelading toegestaan word, of die siekte uitgesluit word van die dekking, en of die dekking volledig afgekeur word.
Dit is belangrik om kennis te neem dat die oorpronklike polis nie geaffekteer sal word nie, tensy die kliënt wil kanselleer. Met betrekking tot gevreesde siekte-dekking sal die premies, selfs al het die kliënt teen die polis geëis, dieselfde bly en voordele weer betaalbaar wees vir ʼn ander siekte, op voorwaarde dat die tweede siekte heeltemal onverwant aan die eerste is. Waar ʼn bepaalde versekeringsproduk proporsionele bedrae van die versekerde bedrag uitbetaal vir verskillende ernstigheidsgrade van die siekte, kan meervoudige betalings moontlik wees vir dieselfde siekte, namate die siekte oor ʼn periode ernstiger raak.
|
