Alle Liberty-kliënte kwalifiseer vir ʼn geleentheid om teen ʼn korting in die notering van Liberty se keureiendomsportefeulje te belê. Hier volg sommige van die besonderhede waarvan jy behoort te weet:
Liberty het onlangs die notering van ʼn gedeelte van sy uiters gesogte, winsgewende keureiendomsportefeulje aangekondig. Teen hierdie tyd sou jy reeds inligting ontvang het oor die Liberty Real Estate Portfolio (LREP), en die aanbod van verdiskonteerde aandele aan bestaande Liberty-kliënte.
Liberty Two Degrees sal genoteer word as ʼn eiendomsbeleggingstrust (REIT), wat ʼn gedeelte van Liberty se winsgewende keureiendomsportefeulje sal insluit. Liberty sal die LREP vir sy kleinhandelkliënte stig, wat eksklusief in die aandele van Liberty Two Degrees sal belê. Die LREP sal ʼn volle toewysing van Liberty Two Degrees-aandele tot op R4 miljard teen 5% korting op die noteringsprys ontvang. Die aandele van R4 miljard sal as volg aangebied word:
- Bestaande beleggers in die Liberty Eiendomsportefeulje (Liberty Property Portfolio) het die opsie om hul volle of ʼn gedeelte van hul portefeulje na die nuwe LREP te skuif, onderhewig aan ʼn maksimum onderskrywingswaarde van R3 miljard.
- Alle bestaande Liberty-kliënte, ingesluit diegene met beleggings in die Liberty Eiendomsportefeulje, het die opsie om nuwe fondse in die LREP te belê, onderhewig aan ʼn verdere R1 miljard-perk.
Hoewel ons baie opgewonde is om hierdie verdiskonteerde aanbod aan ons kliënte te maak, is dit belangrik dat jy jou finansiële adviseur kontak om seker te maak dat die belegging aan jou huidige finansiële behoeftes en risikoprofiel voldoen, veral vir die kliënte wat in aftree-annuïteite belê is.
Wat jy behoort te weet
Kan ek my aftree-annuïteit verskuif van die Liberty Eiendomsportefeulje na die LREP? Aftree-annuïteite word geklassifiseer onder Regulasie 28 van die Wet op Pensioenfondse, wat die bedrag wat jy in genoteerde bates soos aandele en genoteerde eiendomme kan belê, beperk. Die LREP bestaan eksklusief uit aandele in Liberty Two Degrees, wat ʼn REIT is, andersins ook bekend as “genoteerde eiendom”. Hoewel die eiendomsportefeulje van Liberty Two Degrees uit dieselfde aandele as jou bestaande Liberty Eiendomsportefeulje bestaan, bepaal Regulasie 28 dat ʼn fonds nie meer as 15% in ʼn enkele genoteerde eiendomsmaatskappy mag belê nie. Daarom kan jy slegs 15% van die fondse in jou aftree-annuïteit vanuit die Liberty Eiendomsportefeulje na die LREP skuif. Dit is die moeite werd om kennis te neem dat die notering van die eiendomsportefeulje nogtans beleggers wat in die Liberty Eiendomsportefeulje bly, sal bevoordeel, aangesien die waarde van die totale eiendomsportefeulje met die notering van Liberty Two Degrees met tussen 3% en 5% behoort te styg.
Het LREP dieselfde risikoprofiel as my Liberty Eiendomsportefeulje? Die LREP dra ʼn hoër risikoprofiel, aangesien die waarde deur die aandelemark bepaal word. Tans word die Liberty Eiendomsportefeulje jaarliks waardeer, gebaseer op eiendomswaardasies en beleggingsbonusse. Die waarde van LREP sal daarteenoor bepaal word deur die aandeleprys van Liberty Two Degrees, wat op die ope mark verhandel. Faktore soos rentekoerse, ekonomiese vooruitsigte en beleggersentiment beïnvloed aandelepryse op ʼn daaglikse basis en beïnvloed die relatiewe waarde van jou belegging in LREP.
Aangesien Liberty Two Degrees ʼn REIT is, sal dit toegelaat word om geld te leen om in nuwe eiendomme te belê. Hierdie skuldfinansiering stel die fonds in staat om te groei, maar verhoog ook die risiko in die fonds. Met die verloop van tyd behoort die skuldfinansiering die LREP in staat te stel om die Liberty Eiendomsportefeulje in waarde te klop, maar teen ʼn groter risiko. Vir beleggers wat minder risiko en ʼn meer voorspelbare groeikoers verkies, sal die Liberty Eiendomsportefeulje meer geskik wees.
Wat gebeur met my bonus indien ek van die Liberty Eiendomsportefeulje omskakel na die LREP? Die Liberty Eiendomsportefeulje betaal twee keer per jaar bonusse uit, met die volgende bonus betaalbaar in Desember. Beleggers wat verkies om na die LREP om te skakel, sal steeds ʼn pro rata-bonus ontvang.
Wanneer moet ek besluit? Die aanbod aan bestaande Liberty-kliënte sluit op 31 Oktober 2016 en is onderworpe aan die notering van Liberty Two Degrees. Dit is nogtans belangrik om kennis te neem dat die omskakeling en nuwe beleggings op ʼn eerste-daar-eerste-klaar (first-come-first-served) basis gedoen sal word. Omskakelings vanuit die Liberty Eiendomsportefeulje sal tot R3 miljard beperk word en nuwe beleggings word tot R1 miljard.
|