Ons is geneig om voort te strompel in die lewe asof dit maar net met ons gebeur, in plaas daarvan om die regte koers in te slaan. Dan wonder ons hoe ons in ʼn buisligverligte kantoor beland het en lang ure werk, sonder om ooit tyd te hê om te sien hoe ons kinders aan sport deelneem of om na ons eie welstand om te sien. Dit is belangrik om jou passie in ag te neem en ʼn leefstyl te vestig wat jou – en jou gesin – se geluk sal koester.
Volg jou passie – met ‘n bestaansdoel!
Moenie geld bo passie kies nie. Sommige mense identifiseer loopbane of betrekkings wat vir hulle finansieel voordelig sal wees, sonder om te oorweeg of hulle enige werksbevrediging sal kry. Dit is hoekom jy dikwels mense kry wat aan hul lessenaars vasgekluister is in beroepe soos finansies of IT, wanneer hulle eerder in ʼn beroep sou wou wees wat hulle aan die beweeg sou hou of in ʼn ander omgewing is.
Maar, volgens lewensafrigter Jessica Sweet, kan “om jou passie te volg” ʼn riskante keuse wees. “Ek het dit keer op keer gesien gebeur. Kliënte raak opgewonde oor hulle idee vir ʼn besigheid wat op passie gebaseer is. Hulle begin planne maak, versier hul kantore in hul geestesoog en wonder hoe die baas gaan reageer wanneer hulle genoeg geld gemaak het om te bedank. En hulle doen al hierdie dinge sonder om die grootste mite in ag te neem.”
“Terwyl jy geld verdien deur te doen waarvoor jy lief is, moet jy onthou: Op hierdie oomblik gee niemand om wat jou passies is nie.” Volgens Sweet behoort jou kliënte en klante allereers die belangrikste te wees: Vra jouself af wat jy aan hulle kan bied en hoe hulle bevoordeel word deur wat jy aanbied. “Jy moet hulle oorreed om soveel vir jou passie om te gee dat hulle jou daarvoor sal betaal.” Met ander woorde, hoekom behoort ander mense soveel soos jyself vir jou passie om te gee?
Kies jou droomleefstyl
Het jy al ooit regtig tot stilstand gekom om te dink oor hoe jy graag sou wou hê jou toekoms daar moet uitsien? Indien jy kon, hoe sal jy graag wil leef?
Cal Newport, die skrywer van verskeie boeke, wat So Good They Can’t Ignore You insluit, en wat ook assistentprofessor in rekenaarwetenskap by die Georgetown University in die VSA is, gee onkonvensionele raad. Hy sê: “Vestig die leefstyl wat jy wil hê. Werk daarvandaan terug.” Hy glo dat om jou passie te volg jou nie “noodwendig sal lei na ʼn lewe wat jy gelukkig sal wees om te lewe nie.” Sy advies is daarom dat jy die regte betrekking moet vind wat by jou verlangde leefstyl pas. Indien jy nie lang ure wil werk nie, is ʼn pos in ʼn nuuskantoor met druk spertye waarskynlik nie ideaal vir jou nie.
Indien jy ʼn Boheemse bestaan wat baie reis insluit verkies, kan jy dit moontlik oorweeg om ʼn reisskrywer te word. Dié keuses moet egter versoenbaar wees met jou bestaande vaardighede. Indien jy dus ʼn loopbaanverandering oorweeg, neem die leefstyl wat jy verkies in ag en oorweeg of jou nuwe loopbaanrigting hieraan voldoen.
Newport definieer leefstyl as ʼn “ʼn gedetailleerde gevoel hoe jou dag-tot-dag-bestaan behoort te wees.” Volgens hom behoort jy die volgende vrae in ag te neem wanneer jy jou ideale leefstyl in jou verbeelding sien:
- Hoeveel beheer het ek oor my skedule?
- Wat is die intensiteitsgraad van my betrekking?
- Hoe belangrik is dit wat ek doen?
- Wat is die statusvlak?
- Watter soort werk is dit?
- Waar woon ek?
- Wat is die aard van my sosiale lewe?
- Hoe is die balans tussen my werk en lewe?
- Wat is die aard van my gesin?
- Hoe ervaar ander mense my?
- Waarvoor is ek bekend?
|
