As individue is ons geneig om aan redes te dink hoekom ons nie kan spaar nie. Daar is altyd iets wat ‘opduik’ wat ons besluit om nie geld opsy te sit nie, regverdig. Navorsing het gewys dat ‘n mens veel meer gedissiplineerd is as jy in ‘n groep spaar.
As ons nie tot die groepspaarpoging bydra nie, laat ons ander mense in die steek en nie net onsself nie. Dit is veel moeiliker om aan jou groep te verduidelik hoekom jy dit nodig geag het om eerder ‘n nuwe selfoon te koop as om daardie maand jou bydrae aan die klub te gee.
Navorsing toon dat spaarklubs ondanks die resessie en werkverliese ‘n styging in spaarvlakke getoon het, terwyl ander vorme van spaar ‘n daling getoon het.
Sowat een derde van Suid-Afrikaners spaar deur middel van ‘n spaarklub, ‘n gebruik wat oor alle vlakke van inkomste heen gewild is en waarby 30% van hoë inkomste-verdieners betrokke is.
Tipes klubs
Spaarklubs kan ‘n verskeidenheid vorme aanneem. Dit kan die tradisionele stokvel wees waar ‘n groep mense vir jaareind-koste spaar en hul koopkrag gebruik om goedere in grootmaat te koop, of dit kan ‘n groep vriende wees wat vir ‘n spesiale vakansie spaar.
Beleggingsklubs, wat in langtermyn-beleggings soos effektetrusts of aandele-portefeuljes belê, word al hoe gewilder. ‘n Effektetrust laat ruimte vir ‘n groot aantal begunstigdes en ‘n groep kan ‘n fonds kies wat in hul beleggingsbehoeftes voorsien, van ‘n geldmark-effektetrustfonds tot ‘n hoë-aandelefonds.
‘n Beleggingsklub kan in ‘n aandele-portefeulje belê deur middel van aanlyn-deelhandel, in welke geval dit ‘n wyse opsie mag wees om ‘n trust te vestig vir die portefeulje om met die kwessies van eienaarskap te handel.
Die beste manier om jou spaarklub te vestig, is in ‘n groep van eenders-denkende mense wat in soortgelyke stadiums van hul lewens is en doelwitte soortgelyk aan mekaar s’n het. Byvoorbeeld julle mag dalk ‘n groep jong professionele vroue of ‘n groep afgetrede mans wees.
Die idee agter ‘n beleggingsklub is om meer oor belegging te wete te kom deur navorsingsbevindings en beleggingsidees te deel, en die klub bestaan gewoonlik uit slegs sowat tien lede.
Wees versigtig om jou by bestaande beleggingsklubs aan te sluit, behalwe as jy die mense goed ken, aangesien kits-rykword-skemas die ronde doen in die gedaante van beleggingsklubs wat belowe om jou die ‘geheime’ van belegging te wys. As jy ‘n beduidende bedrag as aansluitingsfooi moet betaal, of as die klub beloftes van bo-mark opbrengste maak, moet jy rooi ligte sien flikker.
Voordele van ‘n beleggingsklub
Buiten die motiveringsfaktor, bied beleggingsklubs verskeie voordele:
- Beleggingsklubs kan fooie verminder deur middel van grootmaat-spaar en onderhandelinge vir afslag.
- Die klub gebruik die kennis van al die lede wanneer ‘n effektetrust of aandeel gekies word.
- Lede kan afsonderlik navorsing oor verskillende tipes beleggings doen en dan aan die groep terugvoer gee.
- Deur hulpbronne te kombineer, kry lede toegang tot beleggings wat moontlik nie vir individue beskikbaar is nie, soos eiendom of BEE-beleggingsgeleenthede.
Word finansieel kundig
‘n Spaarklub is ook ‘n geleentheid om jouself oor finansies op te voed. Gebruik jul gesamentlike hulpbronne om iets nuuts te leer. Of jy ‘n basiese stokvel bedryf of ‘n beleggingsklub wat sy eie aandele-portefeulje het, gebruik die geleentheid om jou kennis oor jou persoonlike finansies te verbeter.
- Bring interessante artikels om by vergaderings te bespreek. Dit kan oor enigiets handel van belegging in eiendom tot hoe om die meeste uit jou mediese fonds te kry.
- Stel doelwitte vir die volgende vergadering, soos om jou eie persoonlike begrotings op te stel, of jou lewensversekering uit te sorteer. Bespreek jou ervaring met die groep; julle kan by mekaar leer.
- Jy mag dalk nie gemaklik voel om oor die volle omvang van jou skuld te praat nie, maar om die uitdagings te bespreek en by mekaar te leer, kan jou werklik motiveer. Al die lede kan ‘n doelwit stel soos om hul winkelkaarte teen die einde van die jaar af te betaal. Doen elke maand verslag oor hoe jy vorder en oor die uitdagings wat jy teëgekom het. Die wete dat jy aan jou vriende moet terugrapporteer, sal jou motiveer om jou geld omsigtig te bestee.
- Praat met mekaar oor maniere wat jy ontdek het om geld te spaar. Kry wenke uit artikels wat jy gelees het en stel vir mekaar uitdagings om te sien waar julle oorbestee.
- Kry inligting oor aanbiedinge en praatjies oor finansiële onderwerpe. As jy deur ‘n finansiële instelling belê, vra of hulle kursusse of werkswinkels aanbied wat jy kan bywoon.
- Vra jou finansiële adviseur om met jou te kom praat oor aftreebeplanning of hoe om ‘n testament op te stel.
Kry ‘n ooreenkoms in plek
Sodra julle saamgestem het om met ‘n spaarklub te begin, is dit nodig om ‘n ooreenkoms op te stel wat hierdie volgende vrae beantwoord:
- Wat is die doel van die klub?
- Waar sal julle belê?
- Hoeveel sal elke persoon bydra? Hoe dikwels sal julle vergader?
- Wat gebeur as iemand ophou bydra of voortydig kontant moet onttrek? Hier kan ‘n ander lid byvoorbeeld die opsie hê om die gewese lid se aandeel in die belegging te koop.
- Waar sal die rekening gehou word?
- Wie sal die gemagtigde ondertekenaars wees? Dit is belangrik dat julle ‘n rekening vir die fonds oopmaak waar minstens twee ondertekenaars vereis word.
- Wie sal die tesourier en die voorsitter wees? Kies ‘n tesourier wat sal tred hou met die beleggings en wat die boeke sal bestuur, sowel as ‘n voorsitter wat as sameroeper van die vergaderings kan optree. Hierdie rolle kan elke jaar omgeruil word.