Donker sjokolade: Donker sjokolade bevat beduidende hoeveelhede flavonoïedes en antioksidante – wat ook in rooiwyn en talle vrugte en groente voorkom – wat siektes beveg. Dit bevat ook hoë vlakke magnesium wat gemoedstoestand verbeter en waterretensie verminder. Sjokolade is in die algemeen nie laag in kalorieë of suiker nie, dus is kwaliteit eerder as kwantiteit belangrik.
Eiers: Paranoia oor eiers is gebaseer op die uitgediende aanname dat die eet van eiergeel verhoogde cholesterol in bloed (en ‘n verhoogde risiko van hartvat- en hartsiektes) veroorsaak. Saam met melk bevat eiers in der waarheid die hoogste biologiese waarde (of goudstandaard) vir proteïene.
Alkohol: Indien alkohol iets is wat jy geniet en matig verbruik, gaan gerus daarmee voort. Natuurlik bevat dit leë kalorieë en moet jy nie oorboord gaan nie, maar die antioksidante is hul gewig in vloeibare goud werd. Wyn is effens beter vir jou as bier, maar dis die een ontspannende “sonde” wat jy sinvol kan geniet – binne perke.
Vleis: Graangevoerde, ongerookte snitte bevat hoë vlakke van waardevolle vette, suiwer proteïene en noodsaaklike voedingstowwe. Maak net slim keuses wanneer jy die meer dekadente vleissoorte kies en vermy rooivleis wat gelaai is met chemikalieë.
Rus ‘n bietjie. Dit is aanvaarbaar om ‘n deeltydse stoelpatat te wees. Hoewel dit belangrik is om ten minste vier keer per week te oefen, is dit ook noodsaaklik om tyd te neem om te ontspan in die gejaagde, stresvolle pas van die moderne lewe. Moenie skuldig voel indien jy ledig is nie – ons het almal tyd nodig om die druk te verlig en ‘n bietjie lui te wees.
Seks. Seks binne ‘n vaste verhouding kan wonderlik gesond wees. Een studie het gesuggereer dat dit mense jonger laat lyk, waarskynlik aangesien seks groeihormone, oftewel “bron van jeug-hormone”, vrystel.
Kom vir ‘n paar minute in die son. Son is noodsaaklik vir die produksie van vitamien D. Talle studies het bevind dat ‘n vitamien D-tekort geassosieer word met ‘n merkbare toename in diabetes, hoë bloeddruk, immuniteitsiektes en talle ander gesondheidsprobleme. ‘n Vitamien D-tekort in besig om ‘n epidemie te word as gevolg van onoordeelkundige advies om sonskyn te vermy. Vermy sonbrand – nie sonskyn nie!
Eet jou voorgereg. Indien jy ‘n voorgereg bestel, beteken dit nie dat jy te veel kalorieë gaan inneem nie. Trouens, indien jy ‘n voorgereg met ‘n hoë waterinhoud soos ‘n helder sop of ‘n groen slaai eet, sal jy meer versadig voel en in totaal minder kalorieë inneem.
Slaap af en toe laat. Hoe meer dikwels jy ‘n alarm nodig het om jou wakker te maak, des te meer raak jou sirkadiese ritme ongesinchroniseer met jou ware slaappatroon, wat kan veroorsaak dat jy op ongereelde tye eet en wat jou metabolisme stadiger kan maak. Dus, gooi die wekker oor naweke weg en word vanself wakker wanneer jou liggaam reg is daarvoor.
Kort periodes van lae-vlak stres kan jou in der waarheid geestelik en liggaamlik meer effektief maak. Stres veroorsaak ‘n verskerpte bewussyn, meer energie en bloedstuwing wat die vrystelling van hormone wat beskermende chemikalieë na die bloedstroom stuur, veroorsaak. Dit help om jou immuniteit te verhoog en verminder die risiko van sekere soorte kanker.
“Wat jou “sondes” ook al is, maak seker dat hulle nie selfvernietigend is nie,” waarsku Abvajee. “Oormatige gebruik van alkohol, af dae en ryk kosse kan vinnig jou gesondheid en jou lewe laat ontspoor. Maak dus wyse keuses. |
