“Dit is die moeite werd om kennis te neem dat daar nie in die laaste 3,5 jaar ‘n markregstelling van meer as 10% in die VSA was nie. Histories sien ons hierdie soort regstellling elke twee jaar, dus kan ‘n mens argumenteer dat ons ‘n regstelling in die VSA kan verwag. Voeg hierby dat die tydperk van Mei tot September histories ‘n swakker periode is en daar is ‘n goeie argument ten gunste daarvan dat ‘n noemenswaardige markregstelling vroeër eerder as later moontlik is.”
Die regstelling wat markontleders verwag het, het gekom en ons het gesien dat globale aandele, kommoditeitspryse en die geldeenhede van ontluikende markte dramaties geval het. Teen 24 Augustus was die JSE reeds 15% laer as sy April-hoogtepunt en was die MSCI-indeks van wêreldaandele 12,2% laer voor herstel. Die enigste wenner was goud, wat aansienlik herstel het naas groot goudprodusente aangesien goud gesien word as ‘n veilige toevlugsoord.
Regstellings is normaal in bulmarkte, veral een wat 6,5 jaar geduur het. Dus is die groot vraag gedurende so ‘n tydperk altyd of dit ‘n regstelling is, en of dit die begin is van ‘n nuwe beermark, aangesien goeie geleenthede vir aankope tydens regstellings ontstaan.
Daar is gemengde gevoelens hieroor, selfs binne Stanlib. Ons ekonoom, Kevin Lings, glo dat die bulmark verby is en hy wys op die swak ekonomieë van die ontluikende markte, China ingesluit. Die heersende standpunt is egter dat hierdie ‘n regstelling in ‘n bulmark – hoewel ‘n verouderde bulmark – is wat lankal moes gebeur het. Met ander woorde, dit kan van korte duur wees.
Die VSA-ekonomie is sterk en inflasie en rentekoerse bly laag. Europa en Japan doen kwantitatiewe verslapping en China kan steeds meer doen om sy ekonomie te stimuleer. Talle ontluikende markte het rentekoerse verhoog sodat hulle dit kan verlaag om groei te stimuleer, hoewel hul geldeenhede baie swak is.
Hoe om jou beleggings te posisioneer
In ons Mei-nuusbrief het ons aan beleggers ‘n meer konserwatiewe benadering tot hulle beleggings voorgestel en dat hulle hul aandeleblootstelling binne hul risikoprofiel verlaag. Indien iemand dié aanbeveling gevolg het, kan ‘n daling in aandelepryse ‘n goeie tyd wees om te begin koop en om die blootstelling aan aandele te verhoog. Indien jy jonk is en ‘n langer tydhorison het, bied ‘n markregstelling die geleentheid om geld in die mark te plaas.
Indien jy nie jou blootstelling aan aandele verminder het nie en ten volle in die mark gebly het, is ‘n val in die mark sekerlik nie die tyd om te verkoop nie. Jy sal die verliese realiseer en indien die regstelling van korte duur is, die herstel misloop. Indien jy egter glo dat dit die begin van ‘n langer beermark-tendens is en dat ons ‘n verdere daling tot ongeveer 20% kan sien, sal jy moontlik verkies om jou blootstelling aan aandele tydens enige korttermynherstelperiode te verminder.
Indien jy maandeliks belê, byvoorbeeld met ‘n debietorder, is ‘n terugsakking in die mark ‘n goeie ding aangesien jy sal voortgaan om aandele teen ‘n laer prys te koop. Selfs al verander dit in ‘n beermark, koop jy steeds teen laer pryse, en kry so goeie maatskappye teen ‘n verlaagde prys.
Vir die risikonemers is dit die moeite werd om af te sluit met advies van die VSA-markkommentator Steve Sjuggerud, wat soek vir areas wat uiters ongewild en goedkoop is en waar die tendense opwaarts neig – wat in hierdie geval goudaandele en goud sal wees – die volgendes om dop te hou is Chinese aandele en mynbou-aandele. Ons sal wag vir die opwaartse neiging voordat ons onsself verbind. |
