Is ek verseker teen die onvoorsiene?
Die primêre doel van mediese dekking is versekering teen daardie groot, onvoorsiene mediese gebeurtenisse, soos ‘n motorongeluk of die geboorte van ‘n vroeggebore baba. Jy het dalk nie oor die afgelope jare ‘n groot eis gehad nie, maar wanneer dié groot gebeurtenisse plaasvind, kan dit tien- en selfs honderde duisende rand beloop.
Selfs indien jy fiks en gesond is, moet jy seker maak dat jy goeie hospitaaldekking het en dat jy verstaan wat daardie dekking voorsien.
Indien jou opsie ‘n limiet plaas op hoeveel aan spesialiste uitbetaal sal word, oorweeg om mediese gapingsdekking (gap-cover) uit te neem wat die verskil tussen die mediese rekening en die bedrag wat jou mediese skema dek, sal betaal.
Watter tariewe betaal die skema aan algemene praktisyns, spesialiste en ander gesondheidsorgverskaffers?
Een van die belangrikste verskille tussen opsies is die tarief wat elkeen aan die mediesediensverskaffer sal betaal. Indien jou opsie slegs 100% van die medieseskematarief betaal, neem kennis dat jy, indien jou verskaffer meer as die medieseskematarief hef, vir die verskil aanspreeklik sal wees. Jy het die reg om ‘n kwotasie van jou mediesediensverskaffer aan te vra voordat jy ‘n prosedure ondergaan. Op dié manier sal jy weet of jy ‘n bykomende bedrag sal moet betaal en kan jy ook met die verskaffer onderhandel.
Sommige opsies kan ‘n bybetaling vir ‘n bepaalde prosedure vereis. Dit verlaag die premie, maar jy moet kennis neem van die bybetaling indien jy ‘n mediese prosedure benodig.
Het ek uitgebreide chroniese dekking nodig?
Voorgeskrewe Minimumvoordele (VMV) is minimum voordele wat ingevolge wetgewing aan alle lede van mediese skemas voorsien moet word. VMV is ‘n stel van 270 mediese toestande, wat 27 chroniese siektetoestande insluit. Indien jy ‘n chroniese toestand het, of ‘n familiegeskiedenis van ‘n chroniese toestand het wat nie deur die VMV gedek word nie, oorweeg om ‘n plan met uitgebreide voordele uit te neem.
Sommige planne gee korting op premies indien jy kies om jou chroniese medikasie deur ’n staatshospitaal te ontvang. Indien jy aan a chroniese toestand ly, is dit ’n goeie manier om medieseskemabydraes to bespaar.
Beplan jy om met ‘n gesin te begin?
Gradeer jou opsie vroegtydig op voor jy beplan om met ‘n gesin te begin, aangesien daar uitsluitings op kraamvoordele kan wees indien jy dit te laat byvoeg. In die algemeen moet jy nie wag totdat jy mediese dekking regtig nodig het voor jy dit reël nie, aangesien daar wagtye of uitsluitings te sprake kan wees.
Het ek bo-drempelvoordele nodig?
‘n Bo-drempelvoordeel is ‘n veiligheidsnet wat dekking verleen vir jou dag-tot-dag-uitgawes sodra jou mediese spaarplan uitgeput is en jy ‘n voorafbepaalde drempelvlak bereik het. Indien jy jonk en gesond is en geen kinders het nie, het jy dalk nie die bykomende dekking nodig nie aangesien jy nooit jou mediese spaarplan sal uitput of jou betalingsdrempel sal bereik nie. Nietemin kan jy vind dat jy die drempelvlak vinnig bereik sodra jy ‘n gesin begin. Dan sal die bo-drempelvoordeel jou ‘n noemenswaardige bedrag op mediese rekeninge, wat jy andersins uit jou eie sak sou moes betaal, bespaar.
Is my dokter op die netwerk?
Opsies wat toegang het tot netwerke van dokters of hospitale bied dikwels die voordeel van meer bekostigbare mediese dekking wat jou sak beter mag pas. In plaas van om dit as keusebeperkend te ervaar, sien dit eerder as ‘n besparing terwyl jy toegang het tot die beste gehalte sorg. Maak seker watter gesondheidsorgverskaffers in jou omgewing deel is van die betrokke mediese skema wat jy oorweeg.
Sommige planne sal besoeke aan algemene praktisyns dek, selfs indien jou mediese spaarplan uitgeput is – solank hulle deel uitmaak van die algemene praktisynsnetwerk. Vir sekere kwalifiserende opsies sal die Liberty Mediese Skema betaal vir twee addisionele konsultasies per gesin by enige algemene praktisyn in die LMS-netwerk uit die risikovoordeel sodra die spaarplan uitgeput is of lede in die selfbetaalgaping (SPG) is. Die Liberty Mediese Skema het ook ‘n spesialisnetwerk wat aan lede op sekere opsies toegang gee tot bekostigbare spesialisdienste binne ‘n redelike afstand van waar hulle woon. |
