Ons is dikwels die enigste mense wat in die pad van ons eie sukses staan. ‘n Gebrek aan selfvertroue kan in alle aspekte van die lewe verlammend wees. Wanneer dit by besluite oor geld kom, verwys vroue in nie-finansiële dissiplines dikwels die aangeleentheid na die mans in hul lewens of los hulle doodeenvoudig hul geld waar dit is uit vrees dat hulle die verkeerde besluit sal neem. Met Vrouedag om die draai, kyk ons hoe jy jouself met betrekking tot jou finansiële toekoms kan bemagtig.
Alles in ons verbeelding
Neuro-Link praktisyn, Kotie Potgieter, is die Hoof Uitvoerende Beampte van MiND, ‘n maatskappy wat bemagtigings- en ontwikkelingsopleiding deur breingebaseerde leergereedskap aanbied. Sy glo dat 90% mense in hulle finansies misluk as gevolg van hul finansiële programmering. “Die gedagterigting ten opsigte van geld is die sleutel tot finansiële sukses,” sê sy. “Ons onderskat dikwels die krag van die programmering van ons onderbewussyn. Byvoorbeeld, indien ons as kind gereeld ervaar het dat ons ouers oor te min geld kla, sal dit in ons volwasse lewens ons direkte verwysing wees met betrekking tot die wyse waarop ons oor geld dink en daarmee handel.”
Ongeag jou agtergrond, om beheer oor jou finansies te neem beteken die herprogrammering van jou denke en die demping van selftwyfel. “Dit is belangrik om soveel onsekerheid as moontlik uit ons lewens te verwyder ten einde vrees uit te skakel,” sê Potgieter. “Om beheer oor ons finansies te neem deur ons gedagterigting en vaardighede te ontwikkel en dan op te tree, vestig eiewaarde in onsself.”
Kry vertroue
Potgieter gee die volgende wenke om finansiële vertroue te bou:
- Begin deur jou denkpatrone en wie jy is te verstaan. Ons is almal verskillend ingestel en moet daarom ons tekortkominge verstaan en daaraan werk. Terapie, om breinprofielontledings te doen of om ‘n toepaslike werkwinkel by te woon, kan in hierdie soektog help.
- Belê in jou kennis en ontwikkel jou vaardighede. Lees boeke of woon praatjies by wat jou sal help verstaan hoe beleggings gestruktureer is, en leer hoe jy groei teen inflasie kan meet.
- Woon ‘n werkwinkel by of raadpleeg ‘n kenner om jou te help om dit wat jy oor geld glo, te herprogrammeer. Dit is moeilik om rykdom te skep indien dit wat jy oor geld glo, jou beperk. Byvoorbeeld, indien ek glo dat geld die wortel van alle kwaad is, hoe sal ek beleggingsmoontlikhede wat die maksimum groei sal verseker, raaksien?
- Jou begroting behoort ten minste 10% vir belegging toe te laat om jou in die gewoonte te kry. Ideaal gesproke behoort jy dan te begin om jou skuld te verminder en eerder as om die oorblywende geld te spandeer, doelbewus te belê.
- Maak jou geld vir jou meer betekenisvol deur ‘n persentasie onselfsugtig terug te gee aan ‘n welsynsorganisasie of saak wat jou na aan die hart lê. Indien ons verwag om te ontvang, behoort ons ook bereid te wees om te gee.
Besoek: www.mindmastery.co.za |
