Hoe kry ons ons kinders om geld beter as ons te bestuur?
Kinders leer die beste uit voorbeelde. Jy kan nie jou kinders leer om te begroot indien jy nie jou eie huishouding se begroting doen nie. Dit begin dus in werklikheid by jou as ouer.
Sakgeld
Sakgeld is ‘n uitstekende manier om kinders te leer om nie net die waarde van geld te besef nie, maar ook hoe om dit te bestuur. Jy kan met sakgeld begin sodra jou kind geleer het om te tel.
Vir jonger kinders sal om genoeg geld te hê om winkel toe te gaan en ‘n bederfie te koop, ‘n gevoel van onafhanklikheid gee en die rekenkundige vaardighede wat hulle nodig het om kleingeld te bereken en te tel, aanleer.
‘n Ouer kind kan begin om doelwitte te stel en sakgeld kan gebruik word om spaarsin aan te leer – hulle kan byvoorbeeld spaar vir ‘n spesiale speelding of kledingstuk.
Sodra hulle tieners word, kan sakgeld omskep word in ‘n toelaag waaruit die tiener verantwoordelik raak om vir hulle eie toiletware, klere en vermaak te betaal.
Om te begroot
Bespreek die huishoudelike begroting met jou kinders en indien toepaslik, laat hulle toe om voorstelle oor toewysings uit die begroting te maak.
Vakansies is ‘n wonderlike geleentheid om kinders by die begrotingsproses te betrek deur ‘n vaste bedrag toe te laat wat die gesin tydens die vakansie kan spandeer en dan navorsing te doen oor aktiwiteite of maniere hoe hulle die geld sou wou spandeer.
Die tienerjare is die ideale tyd om ‘n kind te leer hoe om binne ‘n begroting te leef. Help jou tiener om te bereken hoeveel hulle elke maand benodig vir toiletware, klere, lugtyd en vermaak en gee hulle ‘n maandelikse toelaag wat hulle dag-tot-dag uitgawes moet dek. In die eerste maand mag hulle dalk alles op lugtyd uitgee, maar binne ‘n paar maande sal hulle leer om die geld te laat hou – solank jy nie ingee en vir hulle ekstra kontant gee nie.
Open ‘n bankrekening
‘n Bankrekening help ‘n kind leer oor spaar en oor banksake. Jy kan dit selfs in ‘n gesinsprojek omskep – help jou kind om navorsing oor verskillende bankrekeninge te doen en om die mees koste-effektiewe manier om banksake te bedryf te verstaan.
Vir ouer kinders met langertermyndoelwitte, is die open van ‘n beleggingsrekening wat aan die aandelebeurs gekoppel is ‘n uitstekende manier om hulle oor langtermynbeleggings te leer.
Indien jou tiener byvoorbeeld ‘n vakansiewerk of ‘n weeklikse deeltydse werk het, moedig hulle aan om R200 – R300 maandeliks in effektetrusts te spaar. Selfs al spaar jou 16-jarige slegs R200 per maand in ‘n effektetrust en dit groei teen 12% per jaar, kan dit soveel as R17 000 werd wees teen die tyd wat hulle 21 word.
Onthou dat ‘n belastingvrye spaarrekening in jou kind se naam geopen kan word en dat hulle tot R30 000 per jaar kan bydra. Aangesien geen belasting op die opbrengs betaalbaar is nie, kan dit ‘n beduidende voordeel vir langtermynspaar hê. |
