Hier volg ʼn skrikwekkende gedagte, Kersfees is oor minder as twee maande! Inkopies wat op die nippertjie gedoen word, eindig gewoonlik rampspoedig, maar ʼn bietjie slim finansiële beplanning kan help.
Jaarliks pak kleinhandelaars die Kersversierings vroeër en vroeër uit, totdat ons sien hoe Kersvader met Halloween-pampoene om ʼn plekkie stoei. Dit gee ook die geleentheid om Kersinkopies vroegtydig te begin doen, wat ons in staat stel om die uitgawes oor ʼn paar maande te versprei. Jy kan ook ʼn voorraad niebederfbare goed soos die alomteenwoordige Quality Street en Kerskoeke, sowel as enige vakansiedekor, opbou.
Die belangrikste aspek is nietemin om ʼn plan te hê, anders versprei jy net die oorspandering.
1. Stel ʼn begroting op: Besluit hoeveel jy die jaar gaan spandeer en hoeveel daarvan aan geskenke sal wees. Die goeie nuus is dat almal finansiële druk ervaar en dat niemand duur geskenke behoort te verwag nie. Ten opsigte van inspirasie – onthou dat die meeste mense beperkte begrotings het, dus sal praktiese geskenke soos klere altyd waardeer word. Dink aan kleiner luukshede wat mense in die moeilike tye opgehou het om vir hulself te koop.
2. Neem ʼn gesinsbesluit: Nader aan die tyd is mense geneig om meegesleur te raak in die gees van die feestyd en perspektief te verloor, dus is ʼn maand of twee voor Kersfees die beste tyd om as gesin saam te besluit oor beperkings op geskenke. Byvoorbeeld, doen hierdie jaar ʼn Geheime Kersvader en trek die name van elke gesinslid uit ʼn hoed. Jy koop een geskenk van ʼn sekere waarde vir die persoon wie se naam jy getrek het. Alternatiewelik kan julle ʼn prysbeperking op geskenke plaas of ooreenkom om tuisgemaakte geskenke te gee. Sommige gesinne gee slegs vir die kinders geskenke.
3. Los die bankkaarte tuis: Doen altyd inkopies met ʼn lysie, sodat jy nie op die ou end oorspandeer nie. Los die kaarte tuis aangesien die versoeking om dit vir nienoodsaaklike aankope te gebruik dalk te groot kan wees. Besluit hoeveel jy op geskenke gaan spandeer, trek die kontant en bly by dié begroting.
4. Eet tuis: Eet altyd voordat jy gaan inkopies doen! Navorsing toon dat dit makliker is om minder te spandeer wanneer ons ʼn vol maag het. Jy sal ook minder geneig wees om geld by die koskiosks uit te gee indien jy eet voordat jy die winkelsentrum besoek.
5. Koop uit die huis: Aanlyn inkopies is ʼn wonderlike manier om die Kersfees-stormloop te vermy en jy sal ook meer geneig wees om by jou geskenklysie te hou. Met aanlyn inkopies kan jy pryse vergelyk en die meeste plekke lewer tuis af. Besoek webwerwe soos www.takealot.com of www.spree.com vir geskenke en Pick n Pay of Woolworths vir kruideniersware.
6. Laat jou lojaliteit vir jou werk: Inkopies aan die einde van die jaar is ook die ideale manier om jou lojaliteitsbelonings te gebruik en geld te spaar.
|